Wokpataninel Rechab’alil Winaqil re Iximulew

De WikiGuate
Saltar a: navegación, buscar
Idioma: Español  • mam • quc

Ri Wokpataninel Rechb'alil Winaqil re Iximulew are jun Chilab'am re ri Wokom B'anb'al Taqanib'al re Iximulew che uto'ik ri Rechb'alil Winaqil ch'ikital pa ri Nima Taqanib'al re Iximulew xuquje ri k'o pa taq k'amowem kib' Ajnajwaral. Are unimal uk'exwach ri Wokpatanib'al Rechab'alil Winaqil re Iximulew man k'o ta pa raqan uq'ab' jun chik wokomil. Kamik ri', ri eqele'n kojom rumal ri Sergio Fernando Morales, ri kujach pa ri junab' oq'o' kab'lajuj (2012). Ri eqele'n re Wokpataninel Rechab'alil Winaqil re Iximulew job' junab' ri uq'ijil. Ri uk'isb'al cha'onem xkanaj kan pa uq'ab' ri Sergio Fernando Morales, pa ri junab' oq'o' wuqub'. Xa k'u jeri', kak'is aq'an pa ri junab' oq'o' kab'lajuj (2012). Are wa' ukab' utaqo'nijil we to'nel ri', k'olinaq chi pa we eqele'n chi uxo'l taq ri junab' oq'o' ka'ib' chi'l oq'o' wuqub', are xujal ri Ri ajsaqwachom Julio Eduardo Arango Escobar (1997/junab' kajq'o' b'elejlajk'al wuqlajuj-oq'o' ka'ib'). Ri upalajil ri Wokpatanijel re Echb'alil Winaqil xnawalij uloq ruk' ri Nima Taqanib'al re Iximulew ri xch'ikitaj uloq ruk' ri Nimalaj uwach Wuj pa ri junab' kajq'o' b'elejlajk'al jo'ob', k'o chik ka'ib' k'ak' ub'antajik chupam: ri Woknimaq Q'attaqanelab' chi'l ri Wokunimal Cha'onem. Xuquje' kab'ix Tob'anel re ri Tinamit chech ri Wokpataninel, xumajij ula chak pa ri wajxaqlajuj q'ij re rik' agosto re junab' kajq'o' b'elejlajk'al wuqub', ruk' ri Suk'ul k'amawanem re ri eqele'n rumal ri eta'manel Gonzalo Menéndez de la Riva (cha'tal pa ri oxlajuj q'ij re agosto pa ri' ri junab'). (Wokpatanib'al re Echb'alil Winaqil re Iximulew, 2010/junab' oq'o' lajuj).


Contenido

Cha'onem

Ri "Wokpatanib'al Rechab'alil Winaqil re Iximulew" (junab' oq'o' lajuj) kuk'utunsaj chi ri winaq cha'tal chech ri eqele'n re Wokpataninel Rechab'alil Winaqil ya'tal chech chi kutz'aqatisaj ronojel ri kajawataj chech ri okik che Nima Q'atal tzij re Wokunimal Q'atsuk'malil. Xuquje', kutak'alib'ej, ya'tal chech ri' ri toq'ob'isab'al jacha chi kech e b'anal taqanib'al re ri Wokom B'anb'al Taqanib'al. Pa k'isb'al re, kuch'ikib'a' chi man ya'tal ta chech kak'oji' nik'aj chik eqele'n chiwachil, xuquje pa taq wokaj no'jib'al patanijem, Wokaj re k'amal taq kib'e ajchakib', no'jib'al patanijem, ajawib' on re taq chak, xuquje' man kachakun ta pa ri reta'manik. Ri ucholajil ri cha'onem re Wokpatanenil re Echb'alil Winaqil jewa' ub'antajik: ri Chilab' Rechab'alil Winaqil re Wokom B'anb'al Taqanib'al kuk'utunsaj kib'i' e oxib' winaq k'aqatal kij. Pa juk'al lajuj uq'ijil, kachapataj rajlaxik aretaq kajach ri ucholb'al b'i'aj, ri Wokom B'anb'al Taqanib'al kasik'in che jun jalan riqoj ib' chech ri ucha'ik ri ajeqomal, ri kajawataj che ka'ib' urox chech ronojel ri kicha'b'al ri e b'anal taqanib'al. B'antajnaq chi k'u ri cha'onem, ri Wokpataninel Rechab'alil Winaqil xcha'tajik ke'uchap e ka'ib' wokpataninelab' kerachi'laj, ri ketob'an ruk' rech kakowin che utz'aqatisaxik ri reqomal. Xuquje' ri a're' kuya'o kakik'exwachij (rumal wuj chapb'al kech) we xa k'o kaq'atowik, we kelna ub'ik on we xa katoli' kan ri eqele'n (ri kacha'b'ex re jun k'ak' ajchoq'e le eqomal). Le e k'aib' taq tob'anel Wokpataninel ya'tal chi kech kakitz'aqatisaj ronojel taq rajawaxik chech ri eqele'n re Wokpataninel Rechab'alil winaqil re Iximulew.

Chuputalil chi'l q'atatajem

Ri Wokom B'anb'al Taqanib'al re Iximulew kakowinik kuq'atab'a' ri Wokpataninel re Echb'alil Winaqil re Iximulew (kuq'alajisaj chi tolon ri eqele'n) rumal taq wa': b'anow ta ri taqatal wi, are jun pa ri chak on chomab'al (k'amb'ejatalik)pa taq chak re no'jib'al patanijem, elesan ib', kamikal, eqelem taj, man k'o ta pa rulew we amaq' sachal juk'al lajuj q'ij man q'atatajnaq ta uxo'l, ri man kuk'am ta rib' jacha ri k'o pa ri utaqanib'al ri Chilab' Rechab'alil Winaqil re Wokom B'anb'al Taqanib'al on rumal chi q'atom tzij chirij rumal sub'un il. ("Wokpatanib'al Rechab'alil Winaqil re Iximulew", 2010/junab' oq'o' lajuj).

Eqomalil/chakpatan

Ri Wokpatanib'al Rechab'alil Winaqil re Iximulew (xuquje k'u ri Wokpataninel Rechab'alil Winaqil xuquje ri e ka'ib' rachi'l) k'o kitaqalemal pa taq ri b'antajb'al jawi' k'o wi b'anow k'ax chech ri Rechab'alil Winaqil pa ronojel ramaq' Iximulew. Chi uxo'l taq ri reqomal are ri uchajixik taq rechab'alil chijujunal winaq, moloj winaq, k'ixb'alil, b'anikil chi'l no'jpatanijem ri kariqitaj chupam ri ukab' q'ataj re ri Nima Taqanib'al re Iximulew, ri kach'aw pa uwi' ri k'aslemal, ri tzoqopitalem, ri suk'mab'alil, ri utzil/ja'maril, ri unimal kiq'ij xuquje ri ujunamil kiwach ri winaq, man kasachan ta pa k'u'xaj ri ajnajwaral junamam chomal ri k'amatal uq'ab' rumal ri amaq', jacha kub'ij ri Wokpatanib'al Rechab'alil Winaqil re Iximulew (2010/junab' oq'o' lajuj). Chupam ri reqomal ri Wokpatanenil Rechab'alil Winaqil re Iximulew, kuya'o kuta' ri uq'atab'axik xuquje ri kelesaxik ri ajchakib' chiwachilal on ajeqomalib' ri, ruk' taq kib'anoj kekisok ri kechab'alil e nik'aj winaq chik. Xuquje' kuya'o kakitaqej ub'i jun suk'mal q'atq'in chi rij xa apachike winaq on popol ri kesokon on kakirayij ub'anik k'ax chech ri Echb'alil Winaqil. Ruk' wa', kuya'o kuta' kitob'anik ri ajeqomalib', e q'atal taq tzij on taq popol ri rajawaxik chech karilo, are k'u ri a're' qas ya'tal chi kech kakib'anala ri ketaq wi aninaq xuquje' qastzij.

E Wokpatanenil Rechab'alil Winaqil majtal ub'i pa ri junab' kajq'o' b'elejlajk'al wuqub'/1987

Ri tat Gonazalo Menéndez de la Riva are xok nab'e Wokpatanenil re Echb'alil Winaqil re Iimulew pa we ojer utzijob'elil we amaq'. Pa ri oxlajuj rajlab'al ik' agosto junab' kajq'o' b'elejlajk'al b'elejeb' xcha'ik xk'am ri uk'amawanem patanijem pa ri wajxaqlajuj q'ij re wa' we ik' ri'. Xk'oji' pa we eqele'n k'a par i ik' noviembre junab' kajq'o' b'elejlajk'al b'elejeb', aretaq xuq'atab'a kanoq kub'ij chi xa rumal urajawachik pa utukelam. Ri xkib'ij ri e jab'un utzijol chi ri uq'atab'axik kan ri eqele'n are xajawan ri maj uto'ik xb'an rumal ri utaqab'anel re Amaq' Iximulew, pa ri' ri q'ij ri' are taqab'anel ri Vinicio Cerezo. "Wokpatanib'al Rechab'alil Winaqil re Iximulew" (2010/junab' oq'o' lajuj), ri tat Mendez de la Riva are ajtij re Kaxk'olil Suk'malil re Facultad de Ciencias Jurídicas y Sociales re ri Nima Tijob'al re San Carlos. Ri to'nel Ramiro de León Carpio xcha'ix pa we eqele'n ri' xuk'am uq'ab' pa ri ik' diciembre junab' kajq'o' b'elejlajk'al ka'ib', re utz'aqatisaxik ri utaqok'nijil ri Menéndez de la Riva. Pa ri junab' kajq'o' b'elejlajk'al kab'lajuj, xtz'aqat ri uq'ijil, xcha' chi jumul rumal ri Wokom B'anb'al Taqanib'al, xq'atex uwach ri uchak pa ri jo'ob' rajlab'al ri ik' julio junab' kajq'o' b'elejlajk'al oxlajuj, aretaq xsik'ix rumal ri Wokom B'antaqaninik are chi kok chech le eqele'n re Nima Taqanel re Amaq' Iximulew, uk'exwach ri tat Jorge Searrano Elías. Ri eqele'n xtoli' kan rumal ri De León Carpio xk'am uq'ab' rumal ri Ajsaqwachom pa uwi' Suk'mab'alil, Lorge Mario García Laguardia. Pa ri ojer utzijob'elil ri amaq' ri urox wokpataninel xpaqi' pa eqele'n pa ri ik' julio junab' kajq'o' b'elejlajk'al oxlajuj xutz'aqatisaj ri uq'ijil reqele'n ri xb'ej chwach pa ri junab' kajq'o' b'elejlajk'al wuqlajuj. Ri Ajsaqwachom Julio Arango Escobar are xok nab'e Wokpatanenil re Echb'alil Winaqil re Iximulew ri qas xutz'aqatisaj ri uq'ijil ri eqele'n xchapataj wi, pa ri b'elejlajuj rajlab'al ik' agosto junab' kajq'o' b'elejlajk'al wuqlajuj k'a pa ri juk'al rajlab'al ik' agosto junab' oq'o' ka'ib'. Ri Ajsaqwachom re Suk'malil Sergio Fernando Morales Alvarado, xutz'ib'aj kan ri ub'i' pa ri ojer tzijob'elil chi are uro' Wokpataninel re Echb'alil Winaqil re Iximulew (xuquje' are ukab' ri kutz'aqatisaj uq'ijil ri utaqo'nil) aretaq xcha' rumal ri Wokom B'antaqaninik pa ri juk'al rajlab'alil ik' agosto junab' oq'o' kab'lajuj. Aretaq xtz'aqat ri jo'ob' junab' ri ch'ikital pa ri taqanib'al chi rij, xcha' chi jumul pa ri juk'al rajlab'al agosto junab' oq'o' wuqub'. Ri uk'isb'al ri utaqa'nil are ri juk'al re ik' agosto junab' oq'o' kab'lajuj. (Wokpatanib'al re Echb'alil winaqil re Iximulew, junab' oq'o' kab'lajuj. (Wokpatanib'al Rechab'alil Winaqil re Iximulew, junab' oq'o' lajuj).

Ri wujil kariqitaj wi

Categorías