Twitz qq'ij, txe qq'ij mo qnawal - WikiGuate

Twitz qq’ij, txe qq’ij mo qnawal

(Última actualización: febrero 27, 2015)

Ajo twitz qq’ij mo txe qq’ij, a yek’il tuk’il tipumal qchwinqil toj kynab’il qchman. Ajo twitz qq’ij mo txe qq’ij in ok tyek’in tib’ tuk’il jun txukup, jun b’ech, jun tze, mo junjun twitz ti’chaq tze’nku q’ij, tx’otx’, a’, kyq’iq’ mo noq ti’ juntl (García, Curruchiche & Taquirá, 2009; Rupflin, 1999). Ajo yol nawal, jun yol toj kyyol qxjalil Nahuat nyolajtz toj México ex ax txilen Ruwäch q’ij toj kyyol qxjalil maya kaqchikel toj Qtanam Paxil, atzan toj qyol mam Twitz qq’ij, a tb’i tkolil, tuk’il, tmuj ex tka’yb’il qchwinqil twitz Qtxu Tx’otx’ (García, Curruchiche & Taquirá, 2009).

Tipumal twitz qq’ij

Toj kynab’il qchman, a tb’i twitz q’ij aj tanq’in jun xjal at taq’b’il tipumal tu’n tb’ant taq’un toj tchwinqil, nkolin ex nmojin tipumal twitz tq’ij ex tkolb’il ti’j (García, Curruchiche & Taquirá, 2009).
Ajo twitz tq’ij jun xjal, in ok tyek’in tib’ ti’j jun twitz Qtxu Tx’otx’ tze’nku t’iw, a’yin, ẍiky, masat, maẍ ex txqantl (García, Curruchiche & Taquirá, 2004). Qe twitz Qtxu Tx’otx’ ite’k te twitz qq’ij, noq jun techb’il tipumal qchwinqil tu’n Qajwil, qu’n toj txe qq’ij ex ti’j twiz qq’ij in ok tyek’in tib’ tipumal qchwinqil q’ontz tu’n Qajwil (Palma, 2006; Rupflin, 1999).

Txjanil twitz qq’ij

A txjanil twitz qq’ij in okin toj kynab’il qchman te aq’b’il tipumal ex txjanil tchwinqil tkyaqil at twitz Qtxu Tx’otx’ ex twitz Kya’j. Tu’ntzan at kye witz, a’, txukup ex chik’ul kyajwil, ex nq’umj toj kynab’il qchman, qa kyanmin ti’chaq, qu’n at kychwinqil, tze’n tanmin q’aq’, tanmin che’w, tanmin a’, ajo yol tanmin, atzan tipumal chwinqil q’ontz tu’n Qajwil, ex kykyaqil ti’chaq in okin kyu’n xjal, at kyajwil mo kyanmin, tze’nku tanmin ja, tanmin toj twi’ ja, tanmin mo tajwil chuj. Ikytzan nyolajtz kyoj kytanam qxjalil, a tajwil jun witz, jun tqan a’, jun xoch mo jun janab’; jun kan mo juntl (García, Curruchiche & Taquirá, 2009).
Ajo ajlab’il q’ij Ab’ya, at junk’al q’ij toj, junjun q’ij at tb’i ex oxjlaj xjaw at toj. Atzan kyb’i junjun q’ij toj qyol mam lu’n: Qman B’e, Aj, I’ẍ, Tz’uchin, Ajmaq, No’j, Chi’j, Q’ankyaq, Ajpu, Imx, Iq’, Aq’b’il, Kan, Ky’ech, Ky’meẍ, Chej, Q’anil, Choj, Tx’i’, B’atz’. Atzan kyu’n Qtxewnaq (k’iche) aqe lu’n: B’atz’, E, Aj, I’x, Tz’ikin, Ajmaq, No’j, Tijax, Kawoq, Ajpu, Imox, Iq’, Aq’ab’al, K’at, Kan, Kame, Kej, Q’anil, Toj, Tz’i’ (Barrios, 2004; León, 1999; Méndez et al., 2008; Rupflin, 1999).
Toj tkyajtx’uk’ txe tq’ij jun xjal, nchi jatz jayet jwe’ q’ij: tnejil a tq’ijil t-xikyil tchwinqil jun k’wal ti’j ttxu, a Tanmin Chwinqil (Ruk’u’x Tz’ukirem). Tkab’, atza ta’ye toj qẍnayaj, a Tanmin ex Tajwil Qanmin (Ruk’u’x Xamalil), a taq’un, q’o’l tumil tchwinqil xjal tuk’il Qajwil. Toxin a Tanmin Nab’il (Ruk’u’x Alaxb’äl). Tkyajin a Tanmin Taq’un Xjal (Ruk’u’x Patän Samäj). Atzan tjwe’yin a Tanmin Ttx’otx’il Tchwinqil (Ruk’u’x Ruchuq’a’ K’aslemäl). (García, Curruchiche & Taquirá, 2009).

Referencias bibliográficas

  • Barrios, C. (2004). Ch’umilal Wuj (2a. ed.). Guatemala: Cholsamaj.
  • García, A. P., Curruchiche, G. & Taquirá, S. (2009). Ruxe’el Mayab’ K’aslemäl: Raíz y espíritu del conocimiento maya. Guatemala: Dirección General de Educación Bilingüe Intercultural, Instituto de Lingüística y Educación de la Universidad Rafael Landívar, Consejo Nacional de Estudios Mayas.
  • León Chic, E. (1999). El corazón de la sabiduría del pueblo maya. Guatemala: Fundación CEDIM.
  • Mendez, L., Valey, E. & Hernández, D. (2008). Historia Mayab’ Capítulo: Mayer Maya’nawom B’aanuhom. Guatemala: Asociación Maya UK’U’XB’E.
  • Palma, D. A. (2006, julio). Conocimientos y prácticas mayas: una aproximación. Revista Voces Instituto de lingüística y educación, año1, número 2, 41-119.
  • Rupflin Alvarado, W. (1999). El Tzolkin. Guatemala: Fundación CEDIM.

¿Te ha gustado? Comparte este artículo

La educación de Guatemala te necesita

Durante los últimos nueve años, desde nuestra fundación en 2009, hemos llevado artículos educativos e información valiosa a millones de guatemaltecos.

En casi una década de vida, Wikiguate ha recibido el apoyo de diversos miembros de la sociedad local y actores internacionales para nacer y establecerse como un sitio de referencia sobre Guatemala.

Ahora te necesitamos a ti también, para seguir creando y editando información y artículos educativos para satisfacción de la población guatemalteca. Nuestro país es una de las cinco naciones más violentas del mundo y con los índices más bajos de desarrollo humano del continente. Solamente la educación nos hará salir adelante.

Apoya a Wikiguate

Pago Seguro