Winaq/quc - WikiGuate

Winaq/quc

(Última actualización: febrero 27, 2015)

Winaq xa jupaj tzij loq’alajisatalik re ri mayab’ q’ijilowem ri kuk’utunsaj ” ri achi”, “ri k’o uk’aslemal” xuquje’ “jun nimalaj k’aslik uwach ri kutz’aqatisaj ri k’aslemal pa ri nima ch’umil, xa rumal chi ri e winaq kkachi’laj kib’ ruk’ ri uxekajil uwachulew xuquje’ kuk’ konojel kaslik’ kiwach pa utzil/jamaril” (García, Curruchiche & Taquirá, 2009). Chech ri Mayab’ tinamit, ri jupaj tzij k’aslikuwach are kuch’a’ ronojel ri k’as chi uwach ri Ulew are k’u kub’ij chi konojel ri k’aslik kiwach k’o kik’aslemal ma xa chech ri uwaculew e’lenaq wi, maj ujech’b’alil, rumal k’u la’ ri Winaq are jun tz’aqat

Konojel taq k’aslik kiwach e k’as chi uwach ri qanan Ulew k’o kik’aslemal xuquje’ ronojel k’o ucholajil ri uk’aslemal, ronojel k’o uq’ijsaq ri kipatanil chupam ri uwachulew, xew na k’ut ri ujech’b’alil chi ri winaqil are jun k’aslik uwach ri k’o uchomab’al k’o uk’olib’al ri uk’aslemal xuquje’ kukoj ri uk’aslemal che uterene’xik ri uk’aslemal ri raxa nima ch’umil. (García, Curruchiche & Taquirá, 2009, p. 210)

Pa ri mayab’ b’anikil ri chomatalno’j Winaq nimalaj upatan

Jacha kub’ij ri Jiménez (2009, p. 15), ri tzij Winaq are jun tikib’alil chomatalno’j kachokon che uk’oxomaxik ri nima uchomab’al ri Mayab’ tinamit:

Pa taq tzijob’elil tz’ib’atalik jacha ne eta’manelab’ kij winaq, ri jupaj tzij Winaq aretaq kaq’axex uwach are kub’ij “achi”. Ri xaq uq’axexik b’anom che we tzij ri’ man katob’an chech tz’aqat uk’oxomaxik we chomatalno’j ri’, xa k’u kunimarisaj uchomaxik ri uk’a’nem k’ulajil ib’ ri kanuk’max rumal ri kaxlan chomab’al: k’ak’arinem/kaxlan ri kuk’ula’j ri “ojer no’jinem” b’anikil-uwachulew, achi-ixoq, nik’aj chik. Pa ri mayab’ chomab’al, ri chomatalno’j Winaq kujuk’am ub’i pa jun nimalaj uk’utunsaxik ri k’aslik uwach, jun k’aslik uwach ri man xaq ta xew kayuj ri chomatalno’j chi rij ri winaqil xa ne nik’aj chik re ri mayab’ wokaj ri sib’alaj nim upatan che ri utz’aqatil ri winaq.

Ri Jiménez (2009) kujikib’a’ chi ri chomatalno’j Winaq kariqitaj pa uk’yal on pa ronojel ri mayab’ taq ch’ab’al, ruk’ oxib’ taq k’utunsa’n ruk’a’m rib’; ri nab’e chi rij ri k’aslik uwach ktzijon wi, ri ukab’ ruk’ ri q’ijil, ri urox ruk’ ri utikilib’al juk’alil re ukemal ri mayab’ ajilanem:

Ri jupaj tzij Winaq xa jun chomatalno’j qastzij mayab’ ri kariqitaj pa uk’yal on pa ronojel ri mayab’ taq ch’ab’al. Jalajoj utz’ib’axik k’o ri kakoj winak, winik, winaq che, ri uk’utunsa’n xa kajunamataj pa taq mayab’ ch’ab’al. Pa uk’yal, ri e mayab’ kakikoj oxib’ ukemom rib’ taq uk’utunsa’n ri jupaj tzij Winaq ri rajawaxik kak’amik. Ri nab’e ruk’a’m rib’ ruk’ ri k’aslik uwach, man xaq ta xew che ri winaqil. Ri ukab’ chi amaq’elil, ruk’a’m rib’ ruk’ ri q’ijil, (juwinaq q’ij). Ri urox ruk’ utikib’alil juk’a’lil re ukemalil mayab’ ajilanem ktzijon wi. Are jun ukemalil uk’utunsa’n ri q’ijsaq, ri k’aslik uwach, ri cholb’al q’ij chi’l ri ajilanem, chomatal taq no’j nimalaj upatan pa ri mayab’ q’ijilowem (Jiménez, 2009, p. 15).

Ruk’ ri ujunamxik utzijoxik ruk’ ri ajilab’al juwinaq jewa’ kub’ij ri Jiménez che (2009, p. 16):

Xa k’amb’alno’j, ri tzij Winaq, are ri ajilab’al juwinaq chi pa ri retal ojer tz’ib’ kak’utwachix wi ukojik ri k’i taq uwach retal tz’ib’. Pa ri ajilanik, ri uk’utuwachi’n ri juwinaq man xaq ta xew rajlaxik kapaqi’ pa juwinaq xa ne ri usolb’ixikil karuk’a’j rib’ ruk’ ri chomatalno’j re ri jun winaq, ri no’jajilanem chi’l ri k’aslemal. Pa taq ri tzijonelil kakoj ri chomatalno’j jacha ne pa ri ch’ab’al mam, winaq ta’ (kub’ij yawab’ ixoq) ri kuk’utunsaj unajal (uq’ijil) ri uk’aslemal ri k’ak’ winaq kumajij ub’i pa ri unak’anob’em k’a pa ri juwinaq q’ij ri ajaxlanq chik. Xa k’u rachi’lam rib’, tiij winaq are kuch’a’ ri nima winaq ri tajin kuk’is jun unajal uq’ijal kumajij ub’i jun chik k’aselmal.

Ruk’ ri ujunamaxik utzijoxik ruk’ ri q’ijsaq jewa’ kub’ij ri Jiménez che (2009, p. 16):

Ri kuk’utunsaj ri tzij winaq chi unajal uq’ijal ruk’a’m rib’ ruk’ nik’aj chi taq chomatalno’j re ri mayab’ q’ijilowem jacha ri na’- are ra’ ri b’anoj “chomanik”, ri naa -are ra’ ri b’anoj “na’ik” ma k’u kaya’taj ta ri jun xaq utukel qas kkachi’laj wi kib’. Ri k’i taq ukojik chi’l taq chomatalno’j che ri tzij winaq kujutaq che uch’ob’ik uk’oxomaxik pa ri qak’aslemal, che ri Mayab’ tinamit chi’l ri e winaqil chi konojel.

Referencias bibliográficas

  • García, A. P., Curruchiche, G. & Taquirá, S. (2009). Ruxe’el mayab’ K’aslemäl Raíz y espíritu del conocimiento maya. Guatemala: Dirección General de Educación Bilingüe Intercultural, Instituto de Lingüística y Educación de la Universidad Rafael Landívar, Consejo Nacional de Estudios Mayas.
  • Jiménez, A. (2009, mayo). Winaq-winik-winak: Base del pensamiento filosófico Maya. Cultura de Guatemala, tercera época, año XXX, volumen II (pp. 15-16). Guatemala: Universidad Rafael Landívar.
  • Mendez, L., Valey, E. & Hernández, D. (2008). Historia Mayab’ Capítulo: Mayer Maya’nawom B’aanuhom. Guatemala: Asociación Maya UK’U’XB’E.

K’iche’ choltzij

  • Chomatalno’j =concepto
  • K’ulajil = binario
  • Ojer no’jinem = tradicional
  • Retal tz’ib’ = logogramas
  • Nim uchomab’al = filósofo
  • Uq’ijal = período

¿Te ha gustado? Comparte este artículo

La educación de Guatemala te necesita

Durante los últimos nueve años, desde nuestra fundación en 2009, hemos llevado artículos educativos e información valiosa a millones de guatemaltecos.

En casi una década de vida, Wikiguate ha recibido el apoyo de diversos miembros de la sociedad local y actores internacionales para nacer y establecerse como un sitio de referencia sobre Guatemala.

Ahora te necesitamos a ti también, para seguir creando y editando información y artículos educativos para satisfacción de la población guatemalteca. Nuestro país es una de las cinco naciones más violentas del mundo y con los índices más bajos de desarrollo humano del continente. Solamente la educación nos hará salir adelante.

Apoya a Wikiguate

Pago Seguro